Kombëtarja shqiptare U-19 e ka nisur në mënyrën më të mirë raundin e dytë të kualifikueseve të Kampionatit Europian në Ligën B. Kuqezinjtë triumfuan 4-0 ndaj Qipros, duke siguruar tri pikët e para falë një paraqitjeje bindëse.
Gabriel Kulla hapi serinë e golave në pjesën e parë, ndërsa Armend Muslika realizoi dy herë pas pushimit. Goli i Himallarit në minutën e 80-të vulosi suksesin e Shqipërisë.
Kulla zhbllokon sfidën, Muslika realizon dopietë
Shqipëria e nisi mirë takimin dhe arriti të kalonte në avantazh gjatë pjesës së parë. Pas një pasimi të Alen Vukajt, Gabriel Kulla, sulmuesi që aktivizohet te Sasuolo, dërgoi topin në rrjetë.
Në pjesën e dytë, kuqezinjtë shtuan ritmin dhe gjetën edhe tri herë rrugën e golit.
Armend Muslika dyfishoi avantazhin në minutën e 48-të, përpara se të realizonte golin e tij të dytë personal në të 66-ën, duke e çuar rezultatin në 3-0.
Në minutën e 80-të, Himallari shënoi golin e katërt për Shqipërinë, duke vulosur fitoren 4-0.
Kuqezinjtë administruan avantazhin deri në përfundim të takimit, duke e mbyllur ndeshjen pa pësuar gol.
Armenia, kundërshtarja e radhës
Me këtë fitore, Shqipëria U-19 e nis raundin e dytë të kualifikueseve me tri pikë dhe një diferencë pozitive prej katër golash.
Ndeshja e radhës do të zhvillohet më 14 nëntor kundër Armenisë, sërish në stadiumin “Sotira Municipal Stadium”, në Qipro.
Kuqezinjtë do të kërkojnë të vazhdojnë ecurinë pozitive dhe të hedhin një tjetër hap drejt objektivave të tyre në këtë fazë të kompeticionit.




