TË FUNDIT
Kthehu te lajmet
Moshat

Shqipëria U-21 surprizon Spanjën, barazim pa gola në Tiranë

Shqipëria U-21 ka marrë një barazim të rëndësishëm përballë Spanjës U-21.

Shqipëria U-21 surprizon Spanjën, barazim pa gola në Tiranë

Shqipëria U-21 ka marrë një barazim të rëndësishëm përballë Spanjës U-21, duke e mbyllur pa gola miqësoren e zhvilluar në stadiumin “Air Albania”. Skuadra e drejtuar nga Alban Bushi zhvilloi një paraqitje pozitive ndaj një prej përfaqësueseve më cilësore të futbollit europian për këtë grupmoshë.

Kuqezinjtë treguan disiplinë taktike dhe organizim gjatë 90 minutave, duke i bërë ballë presionit të kundërshtarit. Pas fitores 3-1 ndaj Luksemburgut, Shqipëria U-21 e mbyll kështu me një tjetër rezultat pozitiv ciklin e miqësoreve të nëntorit.

Dodaj dhe Rashica rrezikojnë, Spanja nuk gjen rrugën e rrjetës

Shqipëria e nisi takimin me vendosmëri, duke kërkuar të mos i linte hapësira kundërshtarit dhe të shfrytëzonte mundësitë për të dalë përpara.

Kevin Dodaj dhe Ermir Rashica patën rastet më të mira për kuqezinjtë, por nuk arritën të konkretizonin mundësitë e krijuara.

Në anën tjetër, Spanja kërkoi të shfrytëzonte cilësitë individuale të futbollistëve të saj, por u përball me një Shqipëri të organizuar mirë në fazën mbrojtëse.

Skuadra e Bushit ruajti përqendrimin gjatë gjithë takimit, duke mos lejuar që kundërshtari të gjente hapësira të shumta pranë portës shqiptare.

Simoni dhe Taho mbajnë portën të paprekur

Një rol të rëndësishëm në barazimin pa gola patën edhe portierët Simon Simoni dhe Alain Taho, të cilët kontribuuan në ruajtjen e rezultatit.

Përveç paraqitjes së portierëve, vëmendje meriton edhe puna e repartit mbrojtës, që arriti të përballonte sulmet e një kundërshtari me potencial të konsiderueshëm ofensiv.

Në shkallët e stadiumit “Air Albania” nuk mungoi as mbështetja e tifozëve shqiptarë, të cilët krijuan një atmosferë pozitive gjatë gjithë ndeshjes.

Dy miqësore pozitive për Shqipërinë U-21

Barazimi ndaj Spanjës vjen vetëm pak ditë pas suksesit 3-1 kundër Luksemburgut, në një tjetër miqësore të zhvilluar në Tiranë.

Në dy takimet e nëntorit, kuqezinjtë regjistruan një fitore dhe një barazim, me tri gola të shënuar dhe vetëm një të pësuar.

Këto përballje i kanë shërbyer trajnerit Alban Bushi për të vlerësuar gjendjen e skuadrës dhe alternativat në dispozicion, në kuadër të përgatitjeve për objektivat e ardhshëm dhe Kampionatin Europian U-21 2027.

Formacioni titullar i Shqipërisë U-21: Simoni, Daka, Sina, Ramaj, Kacurri, Përndreca, Huqi, Fetai (kapiten), Brruti, Dodaj, Rashica.

Shqipëri U-21 – Spanjë U-21 0-0