Shqipëria U21 ka marrë një fitore 3-1 ndaj Luksemburgut në miqësoren e zhvilluar në stadiumin “Air Albania”. Kuqezinjtë e drejtuar nga Alban Bushi përmbysën disavantazhin e hershëm, falë golave të Ermir Rashicës, Brrutit dhe Kevin Dodajt.
Miqtë kaluan të parët në avantazh në minutën e 13-të, por reagimi i Shqipërisë nuk vonoi. Kapiteni Ermir Rashica riktheu baraspeshën në minutën e 23-të, pasi u gjend i vetëm në hyrje të zonës dhe mposhti portierin kundërshtar me një goditje të saktë.
Brruti përmbys rezultatin me një eurogol
Kuqezinjtë vijuan të sulmonin dhe në minutën e 35-të realizuan golin e përmbysjes. Brruti lëshoi një goditje spektakolare nga distanca, duke e dërguar topin në rrjetë dhe duke i dhënë Shqipërisë avantazhin 2-1 në përfundim të pjesës së parë.
Në pjesën e dytë, skuadra e Bushit ruajti epërsinë, ndërsa në minutën e 88-të Kevin Dodaj shënoi golin e tretë, duke vulosur fitoren 3-1.
Spanja, testi i radhës për kuqezinjtë
Pas suksesit ndaj Luksemburgut, Shqipërinë U21 e pret një tjetër përballje miqësore, këtë herë ndaj Spanjës U21, më 17 nëntor. Sfida do të jetë një test i rëndësishëm për të rinjtë kuqezi përballë një kundërshtari me traditë në futbollin europian.
Shqipëri U21 3-1 Luksemburg U21
Golat e Shqipërisë: Rashica 23', Brruti 35', Dodaj 88'.
Formacioni titullar i Shqipërisë U21: Simoni, Bajraktari, Muçi, Kurti, Bashi, Ramaj, Huqi, Simnica, Brruti, Rashica, Maksuti.
Trajner: Alban Bushi.




