TË FUNDIT
Kthehu te lajmet
Kosovë

Largimi drejt Arabisë ndez konfliktin, Malisheva paralajmëron masa ligjore ndaj Brdariçit

Malisheva ka reaguar zyrtarisht pas largimit të trajnerit Thomas Brdariç drejt Al-Bukiryah FC, klub që garon në kategorinë e dytë të futbollit saudit.

Largimi drejt Arabisë ndez konfliktin, Malisheva paralajmëron masa ligjore ndaj Brdariçit

Malisheva ka reaguar zyrtarisht pas largimit të trajnerit Thomas Brdariç drejt Al-Bukiryah FC, klub që garon në kategorinë e dytë të futbollit saudit.

Sipas klubit kosovar, trajneri e ka ndërprerë në mënyrë të njëanshme kontratën për të pranuar ofertën nga Arabia Saudite. Drejtuesit kanë paralajmëruar se do të ndërmarrin hapa ligjorë dhe institucionalë për të mbrojtur interesat e Malishevës.

“Trajneri Thomas Brdariç ka vendosur të ndërpresë në mënyrë të njëanshme kontratën e punës me klubin, pas pranimit të një oferte të re nga Al-Bukiryah FC”, thuhet në reagim.

Malisheva bëri të qartë se çështja nuk do të mbyllet vetëm me largimin e teknikut.

“Klubi do të ndërmarrë të gjithë hapat e nevojshëm ligjorë dhe institucionalë për të mbrojtur interesat e tij dhe për ta përmbyllur këtë çështje në përputhje me dispozitat kontraktuale dhe rregulloret në fuqi”, vijon njoftimi.

Pavarësisht përplasjes kontraktuale, klubi e ka falënderuar Brdariçin për punën e bërë dhe i ka uruar sukses në aventurën e re.

“Pavarësisht mënyrës së përfundimit të bashkëpunimit, klubi e falënderon trajnerin për angazhimin dhe kontributin e dhënë. I urojmë suksese në sfidën e tij të re”, përfundon reagimi i Malishevës.