Ivan Gvozdenoviç nuk është më trajner i Elbasanit. Klubi verdheblu ka pranuar zyrtarisht dorëheqjen e teknikut serb, duke i dhënë fund bashkëpunimit që kishte nisur në dhjetor të vitit 2024.
Vendimi erdhi pas humbjes 2-1 në transfertë ndaj Skënderbeut, në ndeshjen e vlefshme për javën e shtatë të Abissnet Superiore. Rezultati negativ e ka lënë Elbasanin 12 pikë pas Teutës kryesuese, duke rënduar situatën e skuadrës në kampionat.
Gvozdenoviç mbyll aventurën pas 76 ndeshjesh
Trajneri 48-vjeçar largohet nga pankina e Elbasanit pas pothuajse dy vitesh në drejtimin e skuadrës. Gjatë kësaj periudhe, Gvozdenoviç ka regjistruar 76 ndeshje në të gjitha kompeticionet, me një bilanc prej 30 fitoresh, 26 barazimesh dhe 20 humbjesh.
Dorëheqja u paraqit fillimisht nga vetë trajneri, ndërsa drejtuesit e klubit vendosën ta pranonin, duke zyrtarizuar përfundimin e bashkëpunimit.
Elbasani konfirmon largimin dhe falënderon trajnerin
Përmes një komunikate në rrjetet sociale, klubi verdheblu konfirmoi ndarjen me Gvozdenoviçin, duke vlerësuar punën dhe kontributin e tij gjatë qëndrimit në pankinë.
Njoftimi i plotë i Elbasanit:
FALEMINDERIT, IVAN GVOZDENOVIC!
AF Elbasani njofton se trajneri Ivan Gvozdenovic ka paraqitur dorëheqjen e tij, vendim të cilin klubi e ka pranuar me respekt dhe mirëkuptim.
Së bashku kemi përjetuar momente të paharrueshme, kemi festuar suksese dhe kemi shkruar faqe të rëndësishme në historinë e klubit tonë.
E falënderojmë Ivanin për profesionalizmin, përkushtimin dhe kontributin e tij të çmuar gjatë këtij rrugëtimi.
Rrugët tona ndahen, por historia që shkruam së bashku do të mbetet përgjithmonë!
Faleminderit për gjithçka, Ivan! Të urojmë suksese në të ardhmen!
Me largimin e Gvozdenoviçit, Elbasani duhet të gjejë tashmë një trajner të ri për vazhdimësinë e sezonit. Deri tani, klubi nuk ka bërë të ditur se kush do ta marrë drejtimin e skuadrës.




