TË FUNDIT
Kthehu te lajmet
Kategoria Superiore

Egnatia kërkon surprizën në Danimarkë, Dede: Duam t'i bëjmë sërish krenarë shqiptarët

Egnatia rikthehet sonte në arenën europiane, ku do të përballet me Aarhusin në ndeshjen e dytë të fazës së ligës në Conference League.

Egnatia kërkon surprizën në Danimarkë, Dede: Duam t'i bëjmë sërish krenarë shqiptarët

Egnatia rikthehet sonte në arenën europiane, ku do të përballet me Aarhusin në ndeshjen e dytë të fazës së ligës në Conference League. Kampionët e Shqipërisë do të luajnë në transfertë, në stadiumin “Cepheus Park”, duke nisur nga ora 21:00.

Pas barazimit 1-1 ndaj Midtjyllandit në “Elbasan Arena”, rrogozhinasit synojnë të vazhdojnë rezultatet pozitive edhe përballë një tjetër kundërshtari danez.

Aarhus konsiderohet favorit në këtë takim, por skuadra e drejtuar nga Nevil Dede shpreson të shfrytëzojë momentin e kundërshtarit dhe të marrë pikë të tjera në kompeticionin europian.

Dede: Grupi është gati, vetëm Bakajoko mungon

Në prag të ndeshjes, trajneri Nevil Dede ka folur për kanalet zyrtare të Egnatias, duke vlerësuar organizimin e udhëtimit dhe gjendjen e skuadrës.

“Kemi bërë një udhëtim të mirë, edhe si orar, por edhe si kohëzgjatje. Organizimi i klublit ka qenë perfekt, normalisht që trajneri ka merak. Në fund fare gjithçka është OK. U njohëm me stadiumin ku do të luajmë nesër si dhe lojtarët me fushën”, deklaroi Dede.

Tekniku theksoi se ngarkesa e kalendarit nuk përbën shqetësim për futbollistët, të cilët kanë punuar për të arritur në këtë nivel.

“Ne luftuam dhe sakrifikuam, për të ardhur në këtë ditë dhe në këtë nivel. Nuk na bën përshtypje ngarkesa apo ngjeshja e ndeshjeve. Besoj që djemtë janë gati, grupi është i plotë, përveç mungesës së gjatë të Bakajokos, gjithë pjesa tjetër është gati. Për Fernandon jam i lumtur që ishte 100 % që në ndeshjen me Vllazninë. Shpresoj që edhe në ndeshjen e nesërme ai të na ndihmojë”.

Egnatia synon një tjetër rezultat pozitiv në Conference League

Barazimi me Midtjyllandin ka rritur besimin në kampin rrogozhinas, por Dede kërkon që skuadra të ruajë përqendrimin dhe të luajë pa u ndikuar nga emri apo cilësia e kundërshtarit.

Trajneri beson se Egnatia ka mundësi të marrë një rezultat pozitiv nëse arrin të zbatojë lojën e saj.

“Unë mendoj që kemi ardhur për të bërë rezultatin tonë, lojën tonë. Duke bërë lojën tonë do të marrim rezultatin që meritojmë. Besoj djemtë do na bëjnë të ndihemi krenarë përsëri”.

Përballja me Aarhusin është një tjetër mundësi që Egnatia të tregojë nivelin e saj në arenën ndërkombëtare, pas paraqitjes pozitive ndaj Midtjyllandit.

Dede: Egnatia meriton respekt, futbolli shqiptar ka bërë progres

Trajneri e konsideron pjesëmarrjen në fazën e ligës një arritje të rëndësishme për klubin, por dëshiron që rrugëtimi europian të mos ndalet te rezultatet e deritanishme.

“Nëse ndeshjen nesër e kalojmë me sukses do të thotë që përballë dy kundërshtarëve danezë, futbolli shqiptar ka progres mjaft të madh dhe uroj që të gjithë shqiptarët të vazhdojnë të krenohen me ne”.

Dede theksoi gjithashtu se Egnatia e ka merituar vendin në këtë kompeticion falë punës së bërë nga futbollistët dhe drejtuesit.

“Egnatia për herë të parë parë ka shkelur në grupet e Ligës së Konferencës, shpresoj nesër të bëjmë akoma dhe më mirë seç kemi mirë. Ne meritojmë shumë, pavarësisht diferencat me kundërshtarët. Egnatia është një klub që meriton shumë respekt. Kjo në saj të cilësisë së futbollistëve, organizimit të klubit dhe gjithçkaje”.

Për kampionët e Shqipërisë, sfida ndaj Aarhusit është një tjetër provë e rëndësishme në debutimin historik në fazën e ligës së Conference League. Pas pikës së marrë në ndeshjen e parë, objektivi është vazhdimësia dhe një tjetër paraqitje bindëse në Europë.