Kualifikimi në fazën e ligës të Conference League i ka sjellë Egnatias jo vetëm suksesin më të madh ndërkombëtar në historinë e klubit, por edhe të ardhura të konsiderueshme financiare.
Sipas skemës së shpërblimeve të UEFA-s, kampionët e Shqipërisë kanë siguruar 3.87 milionë euro nga rrugëtimi në fazat kualifikuese dhe pjesëmarrja në fazën e ligës.
Si ndahet shuma
Egnatia ka përfituar 700 mijë euro nga katër raundet kualifikuese, me nga 175 mijë euro për secilën fazë.
Pjesa më e madhe e të ardhurave vjen nga kualifikimi në fazën e ligës të Conference League. Vetëm pjesëmarrja në këtë fazë i garanton klubit rrogozhinas 3.17 milionë euro.
Shuma totale mund të rritet më tej nga mekanizmat e tjerë të shpërndarjes së UEFA-s, të drejtat televizive dhe bonuset e rezultateve në gjashtë ndeshjet e fazës së ligës.
Mundësi e madhe për zhvillimin e klubit
Të ardhurat nuk përfaqësojnë fitimin neto, pasi Egnatia duhet të mbulojë edhe shpenzimet e udhëtimeve, organizimit të ndeshjeve dhe bonuset e skuadrës.
Pavarësisht kostove, 3.87 milionë euro përbëjnë një burim të rëndësishëm financiar. Kjo shumë i krijon klubit mundësi për të investuar në skuadër, infrastrukturë dhe zhvillimin afatgjatë të projektit.
Për Egnatian, aventura europiane tashmë po kthehet në një sukses të dyfishtë, sportiv dhe financiar.




