TË FUNDIT
Kthehu te lajmet
Kombëtare

Maran paralajmëron pas fitores me Finlandën: Nuk duhet ta ulim ritmin

Shqipëria triumfoi 2-0 ndaj Finlandës në stadiumin “Air Albania”.

Maran paralajmëron pas fitores me Finlandën: Nuk duhet ta ulim ritmin

Shqipëria triumfoi 2-0 ndaj Finlandës në stadiumin “Air Albania”, duke siguruar tri pikë të rëndësishme në garën për kreun e grupit në Ligën e Kombeve. Megjithatë, trajneri Rolando Maran nuk mbeti plotësisht i kënaqur me paraqitjen e kuqezinjve, duke evidentuar një problem që skuadra duhet ta korrigjojë.

Në deklaratat pas ndeshjes, tekniku italian vlerësoi fleksibilitetin taktik dhe paraqitjet individuale, por kërkoi më shumë vazhdimësi në lojë, veçanërisht në minutat e fundit.

Maran vlerëson Pilon, Hysajn dhe Mitajn

Trajneri i Kombëtares theksoi se Shqipëria nuk duhet të mbështetet vetëm te një skemë taktike, por të jetë në gjendje të ndryshojë mënyrën e lojës sipas kundërshtarit.

“Nuk është fokusi vetëm te një formacion fiks, por edhe te fleksibiliteti, në varësi të karakteristikave të kundërshtarit. Nuk është vetëm Pilo, edhe Hysaj ka bërë shumë mirë, apo Mitaj, që nuk ka rolin e tij të zakonshëm, por po bën shumë mirë. Pra, kemi lojtarë të ndryshëm që kanë zhvilluar paraqitje të nivelit të lartë”, deklaroi Maran.

Italiani veçoi kështu kontributin e tre futbollistëve, duke vlerësuar veçanërisht përshtatjen e Mitajt në një pozicion ndryshe nga ai ku aktivizohet zakonisht.

“Nuk duhet t'ia lejojmë vetes të ulim ritmin”

Pavarësisht rezultatit pozitiv, Maran pranoi se Shqipëria pati vështirësi në administrimin e lojës gjatë 10-15 minutave të fundit.

“Nuk duhet t'ia lejojmë vetes të ulim ritmin. Kur e bëjmë këtë, e kemi të vështirë, siç ndodhi edhe sot në 10-15 minutat e fundit. Ishte një ndeshje e ekuilibruar. Kemi prekur shumë topa në zonën kundërshtare”, u shpreh trajneri.

Sipas tij, kuqezinjtë duhet të ruajnë intensitetin dhe përqendrimin për të shmangur situatat që mund t'i japin mundësi kundërshtarit të rikthehet në lojë.

Ky mbetet një nga aspektet që stafi teknik duhet të përmirësojë përpara përballjes së fundit në grup ndaj Bjellorusisë.

Goli i Muçit, Maran: Mund t'i japë besim

Trajneri komentoi edhe golin spektakolar të Ernest Muçit, i cili zhbllokoi rezultatin në minutën e 35-të me një goditje të jashtëzakonshme me pjesën e jashtme të këmbës.

“Shikoj gjithmonë rëndësinë e golit. Muçi i ka tipikë gola të tillë. Ndoshta ka pasur nevojë për një shtysë të tillë”, deklaroi Maran.

Tekniku italian beson se ky realizim mund të shërbejë si një shtysë për futbollistin në vazhdimësinë e paraqitjeve të tij me Kombëtaren.

Me fitoren ndaj Finlandës, Shqipëria ngjitet në kuotën e 12 pikëve dhe hedh një hap të rëndësishëm drejt objektivit për ta mbyllur Grupin C1 në vendin e parë.