Shqipëria do ta mbyllë dritaren e tetorit me ndeshjen ndaj San Marinos. Takimi do të luhet të martën, më 6 tetor, në orën 20:45, në stadiumin “Air Albania”.
Trajneri Rolando Maran pritet të bëjë disa ndryshime në formacion, si për të menaxhuar ngarkesën fizike, ashtu edhe për të mbrojtur lojtarët që rrezikojnë pezullimin për shkak të kartonëve.
Qefalija dhe Kerjota presin mundësinë
Feta Fetai dhe Samuele Sina janë larguar nga grumbullimi për t’iu bashkuar Kombëtares U-21 të drejtuar nga Alban Bushi. Të dy do të jenë në dispozicion të Shpresave për miqësoren ndaj Ukrainës.
Largimi i tyre mund t’u hapë hapësirë Klevi Qefalijës dhe Sabah Kerjotës. Dy lojtarët mbetën në tribunë për ndeshjen ndaj Finlandës, por këtë herë mund të përfshihen të paktën në pankinë.
Maran ka aktualisht 25 futbollistë në dispozicion, ndërsa në listën zyrtare të ndeshjes mund të regjistrohen vetëm 23. Për këtë arsye, dy lojtarë të tjerë duhet ta ndjekin sfidën nga tribuna.
Zgjedhjet përfundimtare do të varen nga formacioni dhe rotacioni që trajneri ka planifikuar për takimin. Shqipëria kërkon të rikthehet te fitorja pas humbjes 2-1 në Helsinki dhe të mbetet në garë për vendin e parë në grup.




