TË FUNDIT
Kthehu te lajmet
Kombëtare

Shqipëria e nis me fitore Ligën e Kombeve, kuqezinjtë mposhtin 2-0 Bjellorusinë

Shqipëria e nisi me fitore aventurën në Ligën e Kombeve. Kuqezinjtë mposhtën 2-0 Bjellorusinë në “Air Albania”, duke ndërprerë serinë prej pesë humbjesh radhazi.

Shqipëria e nis me fitore Ligën e Kombeve, kuqezinjtë mposhtin 2-0 Bjellorusinë

Shqipëria e nisi me fitore aventurën në Ligën e Kombeve. Kuqezinjtë mposhtën 2-0 Bjellorusinë në “Air Albania”, duke ndërprerë serinë prej pesë humbjesh radhazi.

Rolando Maran regjistroi suksesin e parë në pankinën e Kombëtares, pikërisht në ndeshjen e tij të parë zyrtare. Kristjan Asllani dhe Ernest Muçi shënuan golat që vendosën takimin që në pjesën e parë.

Bjellorusia kërcënon, Berisha shpëton Shqipërinë

Pasojat e rezultateve të fundit u ndien gjatë 20 minutave të para. Shqipëria e nisi ndeshjen në mënyrë kaotike, sidomos në mbrojtje, dhe i lejoi Bjellorusisë të krijonte dy mundësi të rrezikshme.

Malashevich kërcënoi menjëherë pas fillimit, ndërsa Barkovsky iu afrua golit në minutën e tetë. Etrit Berisha ndërhyri në momentin e duhur, duke justifikuar rikthimin në portën kuqezi.

Skuadra e Viktor Goncharenkos ishte më e qartë në lojën e saj. Shqipëria, në anën tjetër, vuante për të ndërtuar aksione. Muçi dhe Taulant Seferi mbetën jashtë lojës, ndërsa Stavro Pilo ishte ndër të paktët që merrte iniciativa.

Asllani ndryshon ndeshjen nga penalltia

Takimi mori një drejtim tjetër në minutën e 33-të. Berat Gjimshiti fitoi një penallti dhe Asllani e ekzekutoi me qetësi, duke kaluar Shqipërinë në avantazh.

Goli ndryshoi paraqitjen e mesfushorit dhe të gjithë skuadrës. Kuqezinjtë fituan kontrollin e topit dhe nisën të shfaqeshin më shpesh pranë portës kundërshtare.

Rei Manaj pati mundësinë të dyfishonte rezultatin, por nuk tregoi të njëjtin efikasitet që e ka karakterizuar me Sivassporin në kampionatin turk.

Muçi shënon golin e sigurisë

Atë që nuk e realizoi Manaj, e bëri Muçi përpara përfundimit të pjesës së parë. Pas një topi të ardhur nga Hysaj, sulmuesi i Trabzonsporit mposhti portierin kundërshtar dhe shënoi golin e dytë.

Muçi konfirmoi formën e mirë dhe i dërgoi skuadrat në dhomat e zhveshjes me rezultatin 2-0.

Shqipëria u paraqit më e qëndrueshme në pjesën e dytë. Kuqezinjtë menduan kryesisht për administrimin e epërsisë, pa marrë shumë rreziqe në sulm.

Seferi shpërdoroi mundësinë më të mirë për golin e tretë, kur u shfaq përballë portierit. Aktivizimi i Myrto Uzunit dhe kombinimet e tij me Muçin e rritën rrezikshmërinë, ndërsa ky i fundit iu afrua dygolëshit të parë me Kombëtaren.

Më e rëndësishmja për Maranin ishte se Shqipëria nuk lejoi më raste serioze në prapavijë dhe e mbylli ndeshjen pa pësuar.

Kjo ishte humbja e parë e Goncharenkos si trajner i Bjellorusisë. Shqipëria, ndërkohë, merr tri pikët e para dhe vendoset në ndjekje të Finlandës në garën për kreun e Grupit 1 të Ligës C.